കെ മുരളീധരന്റെ പ്രസ്താവനയെപ്പറ്റി അദ്ദേഹത്തോട് തന്നെ ചോദിക്കണം; പുരാവസ്തു കേസിൽ ഇഡിക്ക് മുൻപിൽ ഹാജരായി കെ സുധാകരൻ

പുതുപ്പള്ളി ഉപതെരഞ്ഞെടുപ്പ് കഴിഞ്ഞാൽ തുറന്നുപറച്ചിൽ നടത്തുമെന്ന കെ.മുരളീധരന്റെ പ്രസ്താവനയെപ്പറ്റി അദ്ദേഹത്തോട് തന്നെ ചോദിക്കണമെന്ന് കെ സുധാകരൻ. കോൺഗ്രസിൽ പ്രശ്നങ്ങളില്ല. പുതുപ്പള്ളിയിൽ ചാണ്ടി ഉമ്മൻ റെക്കോർഡ് വിജയം നേടും. ഇക്കാര്യത്തിൽ മുഖ്യമന്ത്രിയെ വെല്ലുവിളിക്കുന്നെന്നും അദ്ദേഹം വ്യക്തമാക്കി. അതേസമയം പുരാവസ്തു ഇടപാടിലെ കള്ളപ്പണ കേസിൽ സുധാകരൻ ഇഡിക്ക് മുമ്പിൽ ഹാജരായി.”താൻ തെറ്റൊന്നും ചെയ്തിട്ടില്ല. അഴിമതി നടത്തണമെങ്കിൽ തനിക്ക് പണ്ടേ നടത്താമായിരുന്നു. വനം മന്ത്രിയായിരുന്നപ്പോൾ എത്രയോ ഓഫറുകൾ വന്നതാണ്. അതിനൊന്നും താൻ വഴങ്ങിട്ടില്ല. തന്നെ ചോദ്യം ചെയ്യുന്നത് പുതുപ്പള്ളി ഉപതെരഞ്ഞെടുപ്പിനെ ബാധിക്കില്ല. തന്റെ കുടുംബത്തിലെ ആർക്കും ഇഡി ഇതുവരെ നോട്ടീസ് നൽകിയിട്ടില്ല. ഇനി കിട്ടിയാലും കുഴപ്പമില്ല”- കെ സുധാകരൻ വ്യക്തമാക്കി.കെ. കരുണാകരന്‍റെ സ്മാരകം നിർമിക്കുന്നതിൽ ശ്രദ്ധ കേന്ദ്രീകരിക്കണമെന്നും, അതുവരെ പൊതുപ്രവർത്തനത്തിൽ നിന്ന് മാറി നിൽക്കാൻ ആഗ്രഹിക്കുന്നെന്നും, പുതുപ്പള്ളി തെരഞ്ഞെടുപ്പ് കഴിഞ്ഞാൽ ചിലത് പറയാനുണ്ടെന്നും നേരത്തെ കെ മുരളീധരൻ പറഞ്ഞിരുന്നു. കോൺഗ്രസിന്റെ പ്രവർത്തക സമിതി പുനസംഘടനയിൽ രമേശ് ചെന്നിത്തല അവഗണിക്കപ്പെട്ടോ എന്ന ചോദ്യത്തിന് മറുപടിയായിട്ടായിരുന്നു അദ്ദേഹത്തിന്റെ പ്രതികരണം.