മുന്‍ മന്ത്രിയും കോണ്‍ഗ്രസ് നേതാവുമായ വക്കം പുരുഷോത്തമന്‍ അന്തരിച്ചു
മുന്‍മന്ത്രിയും മുതിര്‍ന്ന കോണ്‍ഗ്രസ് നേതാവുമായ വക്കം ബി. പുരുഷോത്തമന്‍ അന്തരിച്ചു. 96 വയസ്സായിരുന്നു. തിരുവനന്തപുരം കുമാരപുരത്തെ വസതിയില്‍ വെച്ചായിരുന്നു അന്ത്യം. അഞ്ചു തവണ ആറ്റിങ്ങലില്‍ നിന്നും നിയമസഭയിലേക്ക് തെരഞ്ഞെടുക്കപ്പെട്ടു. മൂന്നു തവണ മന്ത്രിയായി. കൃഷി, തൊഴില്‍, ആരോഗ്യം, ധനകാര്യം, ടൂറിസം, എക്സൈസ് തുടങ്ങിയ വകുപ്പുകള്‍ കൈകാര്യം ചെയ്തു. അച്യുതമേനോന്‍, നായനാര്‍, ഉമ്മന്‍ചാണ്ടി മന്ത്രിസഭകളില്‍ അംഗമായിരുന്നു. 1971 മുതല്‍ 1977 വരെ കൃഷി, തൊഴില്‍ വകുപ്പുകളുടെ ചുമതല വഹിച്ചു. 1980 ജനുവരി മുതല്‍ 1981 ഒക്ടോബര്‍ വരെ ആരോഗ്യം, ടൂറിസം വകുപ്പും, 2004 ല്‍ ധനകാര്യം, എക്സൈസ് വകുപ്പുകളുടെ മന്ത്രിയുമായി പ്രവര്‍ത്തിച്ചു.
ഉമ്മന്‍ചാണ്ടി മന്ത്രിസഭയില്‍ ധനമന്ത്രിയായിരുന്നു. ഉമ്മന്‍ചാണ്ടി ചികിത്സയില്‍ പോയപ്പോള്‍, മുഖ്യമന്ത്രിയുടെ ചുമതലയും വഹിച്ചിട്ടുണ്ട്. രണ്ടുതവണ നിയമസഭ സ്പീക്കറുമായിട്ടുണ്ട്. 1982 ലും 2001 ലുമാണ് സ്പീക്കറായത്. ഏറ്റവുമധികം നാള്‍ നിയമസഭാ സ്പീക്കര്‍ സ്ഥാനം വഹിച്ച റെക്കോഡിനുടമയാണ് അദ്ദേഹം. രണ്ടു തവണ ആലപ്പുഴയില്‍ നിന്നും എംപിയുമായിട്ടുണ്ട്. 1993 മുതല്‍ 1996 വരെ ആന്‍ഡമാന്‍ നിക്കോബാര്‍ ലഫ്റ്റനന്റ് ഗവര്‍ണറായിരുന്നു. ത്രിപുരയിലും മിസോറമിലും ഗവര്‍ണറായും ഇരുന്നിട്ടുണ്ട്. കെ.പി.സി.സി വൈസ് പ്രസിഡന്റ്, കെ.പി.സി.സി ജനറല്‍ സെക്രട്ടറി, 25 വര്‍ഷം എ.ഐ.സി.സി അംഗം, ഡി.സി.സി പ്രസിഡന്റ് തുടങ്ങിയ പദവികളിലും പ്രവര്‍ത്തിച്ചിട്ടുണ്ട്. 2014ല്‍ മിസോറാം ഗവര്‍ണ്ണര്‍ ആയിരിക്കെയുള്ള അദ്ദേഹത്തിന്റെ രാജി ഏറെ പ്രാധാന്യം നേടിയിരുന്നു. നാഗാലാന്റിലേക്ക് ട്രാന്‍സ്ഫര്‍ ചെയ്ത നടപടിയില്‍ പ്രതിഷേധിച്ചായിരുന്നു രാജി.
സര്‍ക്കാര്‍ ജീവനക്കാരെ പോലെ സ്ഥലംമാറ്റം നടത്താനുള്ളവരല്ല ഗവര്‍ണ്ണര്‍ പദവി വഹിക്കുന്നവരെന്നും, പദവിക്ക് അതിന്റേതായ ബഹുമാനം നല്‍കണമെന്നുമായിരുന്നു അദ്ദേഹത്തിന്റെ പ്രതികരണം. അധികാരത്തിന്റെ ഇടനാഴികള്‍ നിറഞ്ഞ ബംഗ്‌ളാവായ ക്ലിഫ് ഹൗസില്‍ വക്കം പുരുഷോത്തമന്‍ താമസിച്ചിട്ടുണ്ടെന്ന പ്രത്യേകതയാണ് എടുത്തു പറയാനും ഓര്‍മ്മയില്‍ നില്‍ക്കുന്നതും. മുഖ്യമന്ത്രിമാര്‍ക്ക് ഔദ്യോഗിക വസതിയായി അനുവദിക്കുന്ന ബം ഗ്ലാവാണ് ക്ലിഫ് ഹൗസ്. പക്ഷേ പതിവ് തെറ്റിച്ച് ഇവിടെ മുഖ്യമന്ത്രി അല്ലാത്ത ആദ്യത്തെ മന്ത്രി എന്ന പദവിക്ക് അര്‍ഹനാണ് വക്കം ബി. പുരുഷോത്തമന്‍. ധനകാര്യ മന്ത്രി ആയിരിക്കെയാണ് വക്കം പുരുഷോത്തമന്‍ ക്ലിഫ് ഹൗസില്‍ താമസിച്ചത്. ഇന്ന് ഇവിടെ കാണുന്ന പല ആധുനികവത്ക്കരണത്തിനും തുടക്കമിട്ടത് ഇദ്ദേഹമാണ്. 2004ലെ താമസ കാലത്താണ് ക്ലിഫ് ഹൗസിന്റെ പുനഃരുദ്ധാരണ പ്രവര്‍ത്തനം നടന്നത്.
തിരുവനന്തപുരം ജില്ലയിലെ ആറ്റിങ്ങല്‍ താലൂക്കിലെ വക്കം ഗ്രാമത്തില്‍ ഭാനു പണിക്കരുടേയും ഭവാനിയുടേയും മകനായി 1928 ഏപ്രില്‍ 12 നായിരുന്നു ജനനം. 1946ല്‍ സ്റ്റുഡന്റ്സ് കോണ്‍ഗ്രസ് എന്ന വിദ്യാര്‍ത്ഥി സംഘടന വഴിയാണ് പൊതുരംഗ പ്രവേശനം. അലിഗഡ് സര്‍വകലാശാലയില്‍ നിയമപഠനം കഴിഞ്ഞ് അഭിഭാഷകനായി ജോലിനോക്കിയ ശേഷമായിരുന്നു സജീവരാഷ്ട്രീയ പ്രവേശം. 1953ല്‍ വക്കം ഗ്രാമ പഞ്ചായത്ത് അംഗമായി. വക്കം പുരുഷോത്തമന്റെ നിര്യാണത്തില്‍ ഈനാട് മലയാളം ചീഫ് എഡിറ്റര്‍ ശിവജി ജഗന്നാഥന്‍ അനുശോചിച്ചു. നേതൃപാടവത്തിന്റെ ഉത്തമോദാഹരണമാണ് വക്കം അദ്ദേഹത്തിന്റെ വിയോഗം കേരളത്തിന് തീരാ നഷ്ടമാണെന്നും അദ്ദേഹം അനുസ്മരിച്ചു. മികച്ച ഭരണാധികാരിയും, രാഷ്ട്രീയ ഭീഷ്മാചാര്യരുമായിരുന്നു വിടവാങ്ങിയ വക്കം പുരുഷോത്തനമെന്ന് ഈനാട് മലയാളം മാനേജിംഗ് എഡിറ്റര്‍ റാണി മോഹന്‍ദാസ് അനുസ്മരിച്ചു. മന്ത്രിയായിരുന്നപ്പോഴും, ഗവര്‍ണറായിരുന്നപ്പോഴും നിലപാടുകളിലെ കാര്‍ക്കശ്യം കൊണ്ട് ശ്രദ്ധനേടിയ വ്യക്തിത്വമായിരുന്നു അദ്ദേഹത്തിന്റേതെന്നും റാണി മോഹന്‍ദാസ് അനുസ്മരിച്ചു.
