ജെയ്‌ക്കിന് ലഭിക്കുന്നത് മികച്ച പിന്തുണ;പുതുപ്പള്ളിയിൽ ജനങ്ങൾ എൽഡിഎഫിനൊപ്പം: ഇ പി ജയരാജന്‍
പുതുപ്പള്ളിയിൽ ജെയ്‌കിന് ലഭിക്കുന്നത് മികച്ച പിന്തുണയും അംഗീകാരവുമാണെന്നും ഇത് തെരഞ്ഞെടുപ്പിൽ പ്രതിഫലിക്കുമെന്നും എല്‍ഡിഎഫ് കണ്‍വീനര്‍ ഇ പി ജയരാജന്‍. പുതുപ്പള്ളിയിലേത് രാഷ്ട്രീയ തെരഞ്ഞെടുപ്പെന്നും ഇ പി ജയരാജന്‍ പറഞ്ഞു. ജെയ്ക് നാമനിര്‍ദേശ പത്രിക സമര്‍പ്പിച്ച ശേഷം സിപിഐ എം ജില്ലാ കമ്മിറ്റി ഓഫീസില്‍ നടത്തിയ വാര്‍ത്താസമ്മേളനത്തിൽ സംസാരിക്കുകയായിരുന്നു അദ്ദേഹം.
കേന്ദ്രസര്‍ക്കാരിന്റെ ജനദ്രോഹ നയങ്ങങ്ങൾ ജനങ്ങളെയാകെ ബുദ്ധിമുട്ടിക്കുന്നതാണ്. മതരാഷ്ട്രം സ്ഥാപിക്കാനും മതത്തിന്റെ പേരില്‍ ഭിന്നിപ്പ് ഉണ്ടാക്കാനുമാണ് കേന്ദ്രം ശ്രമിക്കുന്നത്. മണിപ്പുർ കലാപം അതിന് ഉദാഹരണമാണ്. കിടങ്ങൂർ പഞ്ചായത്തിൽ യുഡിഎഫ് ബിജെപിയുമായാണ് ഐക്യം ഉണ്ടാക്കിയിട്ടുള്ളത്. മണിപ്പൂരില്‍ കലാപം ഉണ്ടാകുന്നവരുമായിട്ടാണ് കിടങ്ങൂരിൽ കോണ്‍ഗ്രസ് കൂട്ടുകൂടിയത് . കോണ്‍ഗ്രസ് ആര്‍എസ്എസിന്റെ സഹയാത്രികരാണ്. കേരളത്തിലെ ജനങ്ങള്‍ എല്‍ഡിഎഫിനൊപ്പമാണ്. പുതുപ്പള്ളിയിലെ ജനങ്ങള്‍ എല്‍ഡിഎഫിനെ സ്വീകരിക്കുമെന്നും ഇ പി ജയരാജന്‍ പറഞ്ഞു.
