ഇന്ത്യൻ റെയിൽവേ ബോർഡിന് ആദ്യമായി ഒരു വനിതാ ചെയർപേഴ്സണ്‍; ജയ വർമ സിൻഹ സെപ്റ്റംബറിൽ ചുമതലയേൽക്കും
ഇന്ത്യൻ റെയിൽവേ ബോർഡ് ചെയർപേഴ്സണും സിഇഒയുമായി ജയ വർമ സിൻഹ ചുമതലയേക്കും. അനിൽ കുമാർ ലഹോട്ടിയുടെ പിൻഗാമിയായാണ് നിയമനം. ഇന്ത്യന്‍ റെയില്‍വേയുടെ 166 വര്‍ഷത്തെ ചരിത്രത്തില്‍ ആദ്യമായാണ് ഒരു വനിത സിഇഒ ചുമതലയേൽക്കുന്നത്.
ഇന്ത്യൻ റെയിൽവേ മാനേജ്‌മെന്റ് സർവീസ് (ഐആർഎംഎസ്), റെയിൽവേ ബോർഡ് (ഓപ്പറേഷൻസ് ആൻഡ് ബിസിനസ് ഡെവലപ്‌മെന്റ്) അംഗവുമായ ജയ വർമ സിൻഹയെ റെയിൽവേ ബോർഡ് ചെയർപേഴ്സണും സിഇഒയും ആയി നിയമിക്കാൻ മന്ത്രിസഭയുടെ അപ്പോയിന്റ്‌മെന്റ് കമ്മിറ്റി അംഗീകാരം നൽകിയതായി കേന്ദ്ര സർക്കാർ വിജ്ഞാപനത്തിലൂടെ അറിയിച്ചു.
1988 ല്‍ ആണ് ജയ വർമ സിൻഹ ഇന്ത്യന്‍ റെയില്‍വേ ട്രാഫിക് സര്‍വീസില്‍ ജോലിക്ക് പ്രവേശിക്കുന്നത്. 35 വർഷത്തിലേറെ നീണ്ട തന്റെ കരിയറിൽ വാണിജ്യം, ഐടി, വിജിലൻസ് എന്നിങ്ങനെ വിവിധ മേഖലകളിൽ പ്രവർത്തിച്ചിട്ടുണ്ട്. ഇന്ത്യൻ റെയിൽവേയിലെ സൗത്ത് ഈസ്റ്റേൺ റെയിൽവേയുടെ പ്രിൻസിപ്പൽ ചീഫ് ഓപ്പറേഷൻസ് മാനേജരായി നിയമിതയായ ആദ്യ വനിതയും ജയ വർമ സിൻഹ ആയിരുന്നു.
