പവൻ കല്യാൺ ചിത്രം ‘ഗുഡുംബ ശങ്കർ’ റീ റിലീസ് ചെയ്തു; ഓർമ്മകൾ പങ്കുവെച്ച് മീര ജാസ്മിൻ

മീര ജാസ്മിനും പവൻ കല്യാണും പ്രധാന വേഷത്തിലെത്തിയ തെലുങ്ക് ചിത്രം ​’ഗുഡുംബ ശങ്കർ’ ഇന്ന് റീ റിലീസ് ചെയ്തു. സെപ്റ്റംബർ രണ്ടിന് പവൻ കല്യാണിന്റെ ജന്മദിനത്തോടനുബന്ധിച്ചാണ് ചിത്രം വീണ്ടും തിയേറ്ററുകളിലെത്തിയത്. തന്റെ ഇൻസ്റ്റ​ഗ്രാം പേജിലൂടെ മീര ജാസ്മിനാണ് ഈ വിവരം പങ്കുവെച്ചത്. ചിത്രത്തിന്റെ പഴയ ലൊക്കേഷൻ ചിത്രങ്ങളും മീര ഉൾപ്പെടുത്തിയിട്ടുണ്ട്. “തന്റെ സിനിമാ ജീവിതത്തിലെ പ്രധാന വഴിത്തിരിവും വഴികാട്ടിയുമായ ചിത്രമാണ് ​’ഗുഡുംബ ശങ്കർ’. ദയയും സഹാനുഭൂതിയും അനുകമ്പയും നിറഞ്ഞ പവൻ കല്യാണിന്റെ പെരുമാറ്റവും തുറന്ന കാഴ്ചപ്പാടും തന്റെ ജീവിതത്തിലെ പ്രതിസന്ധി ഘട്ടങ്ങളിൽ ആശ്വാസമായിട്ടുണ്ട്. ഈ ഓർമകൾ പങ്കുവയ്ക്കാനായതിൽ സന്തോഷം”- പോസ്റ്റിനോപ്പം മീരാ ജാസ്മിൻ കുറിച്ചു.’ഗുഡുംബ ശങ്കറി’ന്റെ മുഴുവൻ അണിയറപ്രവർത്തകർക്കും ആശംസകളും മീര അറിയിച്ചിട്ടുണ്ട്. 2004-ലായിരുന്നു ​’ഗുഡുംബ ശങ്കർ’ റിലീസ് ചെയ്തത്. പവൻ കല്യാണിന്റെ ജന്മദിനം ചിത്രത്തിന്റെ അണിയറപ്രവർത്തകരും ആരാധകരും ചേർന്ന് ആഘോഷമാക്കുകയാണ്. വീരശങ്കർ ബൈരിസെട്ടിയുടെ സംവിധാനത്തിൽ നാ​ഗേന്ദ്ര ബാബു നിർമിച്ച ചിത്രത്തിന്റെ തിരക്കഥ പവൻ കല്യാണിന്റേത് തന്നെയായിരുന്നു.