ഏഷ്യയിലെ ഏറ്റവും ഉയരമുള്ള വൃക്ഷരാജാവ്; സൈപ്രസിന്റെ വിശേഷങ്ങൾ

ഏഷ്യാഭൂഖണ്ഡത്തിലെ ഏറ്റവും ഉയരം കൂടിയ വൃക്ഷം കണ്ടെത്തിയിരിക്കുന്നു ഗവേഷകർ. ടിബറ്റിലെ  യാർലുങ് സാങ്ബോ ഗ്രാൻഡ് കാന്യോൺ നേച്ചർ റിസർവിലെ വനമേഖലയിലാണ് ഏഷ്യയിലെ  വൃക്ഷഭീമനുള്ളത്. ആ ഹിമാലയൻ സൈപ്രസി (കുപ്രെസസ് ടോറുലോസ) ന്റെ ഉയരം 335 അടി (102 മീറ്റർ)! 305 അടി (93 മീറ്റർ) ഉയരമുള്ള സ്റ്റാച്യു ഓഫ് ലിബർട്ടിയേക്കാൾ ഉയരമുള്ള വൃക്ഷമാണ് സൈപ്രസ്.  പെക്കിംഗ് സർവകലാശാലയിലെ ഗവേഷകരാണ് സൈപ്രസിനെക്കുറിച്ചുള്ള പഠനത്തിൽ ഏർപ്പെട്ടിരിക്കുന്നത്. 

കാലിഫോർണിയയിലെ റെഡ്വുഡ് നാഷണൽ പാർക്കിൽ സ്ഥിതി ചെയ്യുന്ന കോസ്റ്റൽ റെഡ് വുഡ് ആണ് ലോകത്ത് അറിയപ്പെടുന്നതിൽ ഏറ്റവും ഉയരം കൂടിയ വൃക്ഷം. ഹൈപ്പീരിയോൺ എന്നു വിളിപ്പേരുള്ള വൃക്ഷരാജാവിന്റെ അമ്പരപ്പിക്കുന്ന ഉയരം 381 അടി (117 മീറ്റർ) ആണ് ! 2006ലാണ് ഹൈപ്പീരിയോണിനെ കണ്ടെത്തുന്നത്. വൃക്ഷരാജാവിനെ സന്ദർശിക്കുന്നതിൽ ഇപ്പോൾ സർക്കാർ വിലക്കേർപ്പെടുത്തിയിട്ടുണ്ട്. സഞ്ചാരികൾ അതിലോലമായ വനത്തിന്റെ ആവാസവ്യവസ്ഥയെ നശിപ്പിക്കുന്നുവെന്ന കാരണം ചൂണ്ടിക്കാട്ടിയാണ് സർക്കാർ സന്ദർശനം നിർത്തലാക്കിയത്. 

നേരത്തെ, മലേഷ്യയിലെ ഡാനം വാലി കൺസർവേഷൻ മേഖലയിൽ വളരുന്ന 331 അടി (101 മീറ്റർ) ഉയരമുള്ള യെല്ലോ മെറാന്റി ആയിരുന്നു ഏഷ്യയിലെ ഏറ്റവും ഉയരം കൂടിയ വൃക്ഷം. മലേഷ്യൻ ഭാഷയിൽ ടവർ എന്നർഥം വരുന്ന മെനാറ എന്നാണ് ഈ വൃക്ഷത്തെ വിളിച്ചിരുന്നത്. പിന്നീട് ഈ വൃക്ഷത്തിനു നാശം നേരിടുകയായിരുന്നു. 

കാലാവസ്ഥാ വ്യതിയാനം, വികസനം, മനുഷ്യന്റെ വിവിധ പ്രവർത്തനങ്ങൾ തുടങ്ങിയ ഭീഷണികൾ നേരിടുന്നതാണ് ടിബറ്റിലെ പ്രകൃതി. രാജ്യത്തെ വിശാലമായ സംരക്ഷണ പ്രവർത്തനങ്ങളുടെ ഭാഗമായി ശാസ്ത്രജ്ഞർ ഉയരമുള്ള വൃക്ഷങ്ങൾ തേടുകയായിരുന്നു. ഉയരമുള്ള വൃക്ഷങ്ങൾ രേഖപ്പെടുത്തുന്നതിലൂടെ, പ്രദേശത്തിന്റെ നിലവിലെ ജൈവവൈവിധ്യം സംരക്ഷിക്കപ്പെടുമെന്നു ഗവേഷകർ പ്രതീക്ഷിക്കുന്നു. അത്തരം അന്വേഷണത്തിലാണ് സൈപ്രസിനെ കണ്ടെത്തുന്നത്. പെക്കിംഗ് യൂണിവേഴ്സിറ്റി, സിസിജിയാംഗ് കൺസർവേഷൻ സെന്റർ, ഷാൻ ഷൂയി കൺസർവേഷൻ സെന്റർ എന്നിവിടങ്ങളിൽ നിന്നുള്ള ശാസ്ത്രജ്ഞരാണു ഗവേഷണപ്രവർത്തനങ്ങൾക്കു നേതൃത്വം കൊടുത്തത്. 

സൈപ്രസിനെ കണ്ടെത്തുന്നതിനു മുന്പ് 2022 ഏപ്രിലിൽ മെഡോഗ് കൗണ്ടിയിൽ 252 അടി ഉയരമുള്ള വൃക്ഷവും തുടർന്ന് ഒരു മാസത്തിനു ശേഷം തെക്കു പടിഞ്ഞാറൻ ചൈനയിൽ 272 അടി ഉയരമുള്ള മറ്റൊരു വൃക്ഷവും ഗവേഷകർ കണ്ടെത്തിയിരുന്നു.