ഉമ്മൻ‌ചാണ്ടി തനിക്ക് പിതൃതുല്യൻ; കുടുംബത്തില്‍ നിന്നാരോ നഷ്ടപ്പെട്ടതുപോലെ തോന്നുന്നുവെന്ന് എം കെ മുനീര്‍
കുടുംബത്തില്‍ നിന്നാരോ നഷ്ടപ്പെട്ടത് പോലെയാണ് മുന്‍ മുഖ്യമന്ത്രി ഉമ്മന്‍ ചാണ്ടിയുടെ വിയോഗത്തില്‍ തോന്നുന്നതെന്ന് മുസ്ലീം ലീഗ് നേതാവ് എം.കെ. മുനീര്‍. അദ്ദേഹം തനിക്ക് പിതൃതുല്യനാണെന്നും, പല ക്ഷേമ പദ്ധതികളും നടപ്പിലാക്കാന്‍ അദ്ദേഹത്തിന്റെ വലിയ പിന്തുണ കാര്യമായിട്ടുണ്ടെന്നും എം.കെ. മുനീര്‍ വ്യക്തമാക്കി.”ജനങ്ങള്‍ക്ക് എന്തെങ്കിലും ഒരു പ്രശ്‌നമുണ്ടായാൽ അവിടെ ഓടിയെത്തുന്ന നേതാവാണ് ഉമ്മന്‍ ചാണ്ടി. അദ്ദേഹം മുഖ്യമന്ത്രി ആയിരുന്നപ്പോള്‍ അദ്ദേഹത്തിന് ചുറ്റും ജനങ്ങള്‍ തിങ്ങി നിറഞ്ഞ് നില്‍ക്കുന്നത് കാണാമായിരുന്നു. ഓരോ മന്ത്രിസഭയിലും ഉമ്മൻ‌ചാണ്ടി വരുന്നത് പാവപ്പെട്ട ഏറ്റവും അടിത്തട്ടിലുള്ള ആളുകളുടെ പ്രശ്‌നങ്ങള്‍ പരിഹരിക്കുന്നതിനുള്ള നിര്‍ദേശവും കൊണ്ടായിരിക്കും. ജനസമ്പര്‍ക്ക പരിപാടിയില്‍ ഒന്ന് ഇരിക്കുക പോലും ചെയ്യാതെ ഭക്ഷണം പോലും കഴിക്കാതെ അദ്ദേഹം ജനങ്ങള്‍ക്ക് വേണ്ടി നില്‍ക്കുകയായിരുന്നുവെന്നും മുനീര്‍ വ്യക്തമാക്കി.തൊണ്ടയിലെ കാന്‍സര്‍ ബാധയെ തുടര്‍ന്ന് ദീര്‍ഘനാളായി ചികിത്സയിലായിരുന്ന ഉമ്മന്‍ ചാണ്ടി ഇന്ന് പുലര്‍ച്ചെ 4.25 ഓടെയാണ് അന്തരിച്ചത്. ബെംഗളൂരുവിലെ സ്വകാര്യ ആശുപത്രിയില്‍ വച്ചായിരുന്നു അന്ത്യം. മകന്‍ ചാണ്ടി ഉമ്മനാണ് മരണവാര്‍ത്ത പുറത്തുവിട്ടത്.
