കെ.സുധാകരന്‍ അനുശോചിച്ചു
- മൂന്ന് ദിവസത്തെ ദുഃഖാചരണം
മുന്‍ ഗവര്‍ണ്ണറും മുതിര്‍ന്ന കോണ്‍ഗ്രസ് നേതാവുമായ വക്കം പുരുഷോത്തമന്റെ നിര്യാണത്തെ തുടര്‍ന്ന് മൂന്ന് ദിവസത്തെ ദുഃഖാചരണം കെപിസിസി ആചരിക്കുമെന്ന് കെപിസിസി പ്രസിഡന്റ് കെ.സുധാകരന്‍ എംപി.
ശക്തനായ ഒരു നേതാവിനെയാണ് കോണ്‍ഗ്രസിന് നഷ്ടമായത്. ഗവര്‍ണ്ണറായും മന്ത്രിയായും സ്പീക്കറായും ശോഭിച്ച അദ്ദേഹം കേരളം കണ്ട മികച്ച ഭരണാധികാരികളില്‍ ഒരാളായിരുന്നു. സ്പീക്കര്‍ പദവിയിലിരിക്കെ സഭയുടെ അന്തസ്സും ഗൗരവവും ഉയര്‍ത്തിപിടിക്കാന്‍ അദ്ദേഹത്തിനായി.കര്‍ക്കശമായ നിലപാടുകള്‍ പുലര്‍ത്തുമ്പോഴും സൗമ്യമായ പെരുമാറ്റമായിരുന്നു. താന്‍ ഉള്‍പ്പെടെയുള്ള നേതാക്കള്‍ക്ക് മാര്‍ഗദര്‍ശിയായ പൊതുപ്രവര്ത്തകന്,കറകളഞ്ഞ മതേതരവിശ്വാസി,കോണ്‍ഗ്രസ് പാര്‍ട്ടിയുടെ ചട്ടക്കൂടില്‍ അച്ചടക്കത്തോടെ എന്നും പ്രവര്‍ത്തിച്ച നേതാവ് എന്നിങ്ങനെ നിരവധി വിശേഷണങ്ങള്‍ക്ക് അര്‍ഹനായിരുന്നു വക്കം. കോണ്‍ഗ്രസിനെ ശക്തിപ്പെടുത്തുന്നതില്‍ അദ്ദേഹത്തിന്റെ സംഭാവനകള്‍ ഒരിക്കലും വിസ്മരിക്കാന്‍ കഴിയില്ല. എനിക്ക് അദ്ദേഹവുമായി ദീര്‍ഘകാലത്തെ ആത്മബന്ധമാണുള്ളത്. വക്കം പുരുഷോത്തമന്റെ വിയോഗത്തിലൂടെ കേരളത്തിന് മികച്ച പൊതുപ്രവര്‍ത്തകനെയാണ് നഷ്ടമായത്. അദ്ദേഹത്തിന്റെ കുടുംബത്തിന്റെ ദുഃഖത്തില്‍ പങ്കുചേരുന്നതോടൊപ്പം ആത്മാവിന് നിത്യശാന്തി ലഭിക്കട്ടെയെന്നും പ്രാര്‍ത്ഥിക്കുന്നു.
കെ.സി.വേണുഗോപാല്‍ എംപി അനുശോചിച്ചു
മുന്‍ ഗവര്‍ണറും മുന്‍മന്ത്രിയും നിയമസഭ സ്പീക്കറും ആയിരുന്ന വക്കം പുരുഷോത്തമന്റെ നിര്യാണത്തില്‍ എഐസിസി ജനറല്‍ സെക്രട്ടറി കെ സി വേണുഗോപാല്‍ എംപി അനുശോചിച്ചു.
വ്യക്തമായ നിലപാടും ശക്തമായ അഭിപ്രായങ്ങളും എന്നും തുറന്നുപ്രകടിപ്പിച്ച വ്യക്തിത്വം. വിദ്യാര്‍ഥി രാഷ്ട്രീയത്തിലൂടെ പൊതുരംഗത്ത് എത്തിയ അദ്ദേഹം തന്റേതായ പ്രവര്‍ത്തന ശൈലി കൊണ്ട് ജനകീയനായ നേതാവാണ്. ഹൃദയം കൊണ്ട് എല്ലാവരെയും സ്നേഹിച്ച മനുഷ്യസ്നേഹിയായ നേതാവ്.സഹോദരതുല്യനായ അടുപ്പം എനിക്ക് അദ്ദേഹവുമായി ഉണ്ടായിരുന്നു. ഗുരുസ്ഥാനീയനായ അദ്ദേഹത്തിന്റെ ഉപദേശങ്ങള്‍ പലപ്പോഴും എന്നിലെ പൊതുപ്രവര്ത്തകന് വഴികാട്ടിയായിട്ടുണ്ട്. സ്പീക്കറായും മന്ത്രിയായും ഗവര്‍ണറായും നിയമസഭാ സാമാജികനായും എംപിയായും മികച്ച നിലയില്‍ പ്രവര്‍ത്തിക്കാന്‍ അദ്ദേഹത്തിനു കഴിഞ്ഞിട്ടുണ്ടെന്നും വേണുഗോപാല്‍ അനുസ്മരിച്ചു.
ഏറ്റവുമധികം കാലം നിയമസഭാ സ്പീക്കര്‍ പദവി വഹിച്ച നേതാവും വക്കം പുരുഷോത്തമാനാണ്. സ്പീക്കര്‍ പദവിയിലിരിക്കെ സഭയെ അച്ചടക്കത്തോടെ നയിക്കുന്നതിലും അംഗങ്ങള്‍ക്ക് സമയനിഷ്ട പാലിക്കുന്നതിലും അദ്ദേഹം കര്‍ക്കശത്തോടെ എടുത്ത നടപടികള്‍ എക്കാലവും ഓര്‍മ്മിക്കപ്പെടുന്നതാണ്. ഒരു നല്ല ഭരണാധികാരിയായി കഴിവ് തെളിയിച്ച അദ്ദേഹം കോണ്‍ഗ്രസിനെ ശക്തിപ്പെടുത്തതിന് നല്‍കിയ സംഭാവനകള്‍ വലുതാണ്. ചുമട്ടുതൊഴിലാളി നിയമം ഉള്‍പ്പെടെ പുരോഗമനപരമായ പരിഷ്‌ക്കാരങ്ങള്‍ കൊണ്ടുവരാന്‍ അക്ഷീണം പ്രയത്നിച്ച ഭരണാധികാരികൂടിയായിരുന്നു അദ്ദേഹം. ഡിസിസി പ്രസിഡന്റ്, കെപിസിസി ജനറല്‍ സെക്രട്ടറി, കെപിസിസി വൈസ് പ്രസിഡന്റ് എന്നീ പദവികളും വഹിച്ച അദ്ദേഹം ദീര്‍ഘകാലം എഐസിസി അംഗമായും പ്രവര്‍ത്തിച്ചു. അദ്ദേഹത്തിന്റെ വിയോഗം കോണ്‍ഗ്രസ് പ്രസ്ഥാനത്തിന് കനത്ത നഷ്ടമാണെന്നും കെ.സി.വേണുഗോപാല്‍ പറഞ്ഞു.
