വിപണിയില്‍ നിഫ്റ്റി 18,100ന് താഴെ
ഓഹരി വിപണിയില്‍ നഷ്ടത്തോടെ തുടക്കം. നിഫ്റ്റി വീണ്ടും 18,100ന് താഴെയെത്തി. സെന്‍സെക്‌സ് 129 പോയന്റ് താഴ്ന്ന് 60,848ലും നിഫ്റ്റി 46 പോയന്റ് നഷ്ടത്തില്‍ 18,072ലുമാണ് വ്യാപാരം ആരംഭിച്ചത്.
18,200 നിഫ്റ്റിക്ക് പ്രധാന പ്രതിരോധ നിലയായി മാറിയതായി ജിയോജിത് ഫിനാന്‍ഷ്യല്‍ സര്‍വീസസിലെ ഡോ.വി.കെ വിജയകുമാര്‍ നിരീക്ഷിക്കുന്നു. 17,800-18,200 നിലവാരത്തില്‍ ചാഞ്ചാടുന്ന നിഫ്റ്റിയെ അതില്‍നിന്ന് മുന്നോട്ടു ചലിപ്പിക്കാന്‍ പ്രധാന ഘടകങ്ങള്‍ വേണ്ടിവരും. കേന്ദ്ര ബജറ്റും യുഎസ് ഫെഡിന്റെ നിരക്കുയര്‍ത്തല്‍ തീരുമാനവും അതിന് കാരണമായേക്കാമെന്നും വിജയകുമാര്‍ വിലയിരുത്തുന്നു. ദീര്‍ഘകാല മൂലധനനേട്ട നികുതി വര്‍ധിപ്പിക്കുകയോ ഫെഡ് നിരക്ക് ഉയര്‍ത്തുകയോ ചെയ്താല്‍ മറിച്ചും സംഭവിക്കാം.
പവര്‍ഗ്രിഡ് കോര്‍പ്, റിലയന്‍സ് ഇന്‍ഡസ്ട്രീസ്, നെസ് ലെ ഇന്ത്യ, ഭാരതി എയര്‍ടെല്‍, ബജാജ് ഫിനാന്‍സ്, എന്‍ടിപിസി, ബജാജ് ഫിന്‍സര്‍വ്, ആക്‌സിസ് ബാങ്ക്, സണ്‍ ഫാര്‍മ, അള്‍ട്രടെക് സിമെന്റ്, കൊട്ടക് മഹീന്ദ്ര ബാങ്ക്, ഐടിസി തുടങ്ങിയ ഓഹരികളാണ് നഷ്ടത്തില്‍. മാരുതി സുസുകി, ടാറ്റ സ്റ്റീല്‍, ടാറ്റ മോട്ടോഴ്‌സ്, മഹീന്ദ്ര ആന്‍ഡ് മഹീന്ദ്ര, ഹിന്ദുസ്ഥാന്‍ യുണിലിവര്‍, ഐസിഐസിഐ ബാങ്ക് തുടങ്ങിയ ഓഹരികള്‍ നേട്ടത്തിലുമാണ്.
ബിഎസ്ഇ മിഡ്ക്യാപ്, സ്‌മോള്‍ ക്യാപ് സൂചികകളിലും നഷ്ടത്തിലാണ് വ്യാപാരം നടക്കുന്നത്.
