ബ്രഹ് മപുരം വിഷയം ; നിയമസഭയില്‍ ഇന്ന് മുഖ്യമന്ത്രിയുടെ പ്രത്യേക പ്രസ്താവന
കൊച്ചി നിവാസികളെ രണ്ടാഴ്ചത്തോളം ശ്വാസംമുട്ടിച്ച ബ്രഹ്‌മപുരം മാലിന്യ സംസ്‌കരണ പ്ലാന്റിലെ തീപിടിത്തത്തില്‍ മുഖ്യമന്ത്രി പിണറായി വിജയന്‍ മൗനം വെടിയുന്നു. വിഷയത്തില്‍ മുഖ്യമന്ത്രി ഇന്ന് നിയമസഭയില്‍ പ്രത്യേക പ്രസ്താവന നടത്തും. ചട്ടം 300 അനുസരിച്ചാകും പ്രസ്താവന നടത്തുക.
12-ാം ദിനം തീണയണച്ചപ്പോള്‍ അഗ്നിശമന സേനയ്ക്ക് അഭിനന്ദനങ്ങള്‍ അറിയിച്ച് ഫെയ്‌സ്ബുക്ക് പോസ്റ്റിട്ടതല്ലാതെ വിഷയത്തില്‍ ഇതുവരെ മുഖ്യമന്ത്രി നിയമസഭയിലടക്കം ഒരു പ്രതികരണവും നടത്തിയിരുന്നില്ല. വിഷയത്തില്‍ നിന്ന് മുഖ്യമന്ത്രി ഒളിച്ചോടുകയാണെന്ന് പ്രതിപക്ഷം ആരോപിച്ചുകൊണ്ടിരിക്കെയാണ് ഇന്ന് പ്രത്യേക പ്രസ്താവന നടത്തുന്നത്. സംഭവത്തില്‍ സര്‍ക്കാര്‍ സ്വീകരിച്ച നടപടികളാകും മുഖ്യമന്ത്രി പ്രധാനമായും വിശദീകരിക്കുക.
തീപ്പിടുത്തവുമായി ബന്ധപ്പെട്ട കാര്യങ്ങള്‍, ജനങ്ങളുടെ ആരോഗ്യപ്രശ്നങ്ങൾ എന്നീ വിഷയങ്ങളിൽ മുഖ്യമന്ത്രി മറുപടി വ്യക്തമാക്കുമെന്നാണ് പ്രതീക്ഷിക്കുന്നത്. ഇതിനോടൊപ്പം മാലിന്യ പ്ലാന്റ് കമ്പനിയുമായി ബന്ധപ്പെട്ട മുഖ്യമന്ത്രിയുടെ നിലപാടും ശ്രദ്ധേയമായിരിക്കും.
പൊതുപ്രാധാന്യമുള്ള വിഷയത്തില്‍ സ്പീക്കറുടെ അനുമതിയോടെ മന്ത്രിമാര്‍ക്കോ മുഖ്യമന്ത്രിക്കോ പ്രസ്താവന നടത്താന്‍ അനുവദിക്കുന്നതാണ് കേരളനിയമസഭാ ചട്ടം 300. ഇതുപ്രകാരം പ്രസ്താവന നടത്തുമ്പോള്‍ ചോദ്യങ്ങള്‍ ചോദിക്കാനാകില്ല. കഴിഞ്ഞ രണ്ടു ദിവസങ്ങളായി ബ്രഹ്‌മപുരത്തെ ചൊല്ലി നിയമസഭയില്‍ പ്രതിപക്ഷ-ഭരണപക്ഷ വാക്‌പോരും ബഹളവും നടന്നുവരികയണ്.
